ӨСКЕМЕН ҚАЛАСЫ №1 ЕМХАНАСЫНДА ШҚО-ДА АЛҒАШҚЫ БОЛЫП ЕРТЕ АРАЛАСУ ОРТАЛЫҒЫ АШЫЛДЫ
Өскемен қаласының №1 қалалық емханасында Шығыс Қазақстан облысындағы алғашқы ерте даму және араласу орталығы ашылды. Бұл — балалардың даму барысын бақылауға, қауіптерді ерте сатыда анықтауға және кешенді — медициналық, психологиялық және әлеуметтік қолдау көрсетуге арналған мамандандырылған бөлімше.
Жоба ҚР Денсаулық сақтау министрлігінің бастамалары аясында жүзеге асырылып, балаларға профилактикалық көмекті күшейтуге және ерте жастағы балалары бар отбасыларды қолдауға бағытталған.
Ашылу салтанатында ШҚО денсаулық сақтау басқармасы басшысының орынбасары Мадина Мырзабекова осындай орталықтарды ашу балалар денсаулығын сақтау жүйесін нығайтудағы маңызды қадам екенін атап өтті:
«Орталықтың жұмысы дамуындағы ауытқуларды ерте анықтауға бағытталады, бұл қажетті емдеу мен қолдауды уақытылы бастауға мүмкіндік береді. Бұл — салауатты ұрпақ қалыптастыруға қосылған үлес. Маңызды жобаны жүзеге асырған емхана ұжымына және облыстық педиатриялық қауымдастыққа алғысымды білдіремін», — деді ол.
Орталықта бірнеше функционалды кабинеттер жұмыс істейді: ерте даму, скринингтік тексерулер, аудиологиялық скрининг, сондай-ақ балалар тамақтануы бойынша ресурс орталығы және патронаж қызметі.
Көмек көрсету үшін педиатрлар, бейінді мамандар, логопедтер мен психологтардан құралған мультидисциплинарлық команда жұмыс істейді.
Емхананың бас дәрігері Айман Мырамытованың айтуынша, мекеме 30 мыңнан астам баланы қамтиды және қаладағы ең ірі балалар медициналық мекемесі болып табылады. Құрамында ЛОР-дәрігер, аймақтағы жалғыз балалар нефрологы, эндокринолог, невропатолог және басқа да мамандар бар.
Орталықтың негізгі бағыттарының бірі — аудиологиялық скрининг. Ол заманауи жабдықта белгіленген кестеге сәйкес өткізіледі: 3 айлық, 1 жас, 2, 3 және 6 жаста. Алматыда оқудан өткен медбикелер Фарида Еламанова мен Алимаш Қайсарованың айтуынша, есту қабілетінің бұзылу күдігі туған жағдайда ақпарат алдымен педиатрға, содан кейін — қажет болған жағдайда — сурдологқа беріледі.
