Жаз мезгілінде балалардың ашық терезеден құлап кету жағдайлары жиілейді. Мұндай қауіпті ескертіп қана қоймай, алғашқы көмек пен алдын алу жолдарын назарларыңызға ұсынамыз.
🚨 Неге қауіп артады?
Жазда ауа райы ыстық болғандықтан, көпшілігіміз бөлмелерді салқындату үшін терезелерді ашып қоямыз. Алайда бұл – әсіресе кішкентай балалар үшін үлкен қауіп көзіне айналады. Олар ашық терезеге сүйеніп, москит торын тіреу ретінде қабылдайды, бірақ бұл – өмірге қауіп төндіретін қателік.
Ресми дерек: Қазақстанда жыл сайын ондаған бала биіктіктен құлау салдарынан түрлі жарақат алады. Олардың арасында өлім-жітім фактілері де тіркелуде.
🧸 Алдын алу үшін не істеу керек?
Мамандар балалардың ашық терезеден құлап кетуінің алдын алу үшін келесі қауіпсіздік шараларын ұстануды ұсынады:
-Москит торына сенбеңіз – ол баланың салмағын көтере алмайды.
-Терезеге арнайы қауіпсіздік құлыптарын орнатыңыз.
-Терезе алдындағы жиһазды алыстатыңыз, себебі ол балаға терезеге көтерілуге мүмкіндік береді.
– Бала терезе маңында жалғыз қалмауы тиіс.
– Пластикалық терезелерге қауіпсіздік тетіктерін (блокиратор) орнатыңыз.
– Баламен ашық әңгіме жүргізіңіз, терезе маңындағы мінез-құлық ережелерін түсіндіріңіз.
⛑️ Құлап кеткен жағдайда алғашқы көмек қалай көрсетіледі?
Егер бала терезеден құлап кетсе, дүрбелеңге салынбай, келесі әрекеттерді жасаңыз:
🔹 Жәбірленушіні қозғалтпаңыз, әсіресе мойын мен арқа жарақаттануы мүмкін;
🔹 Жедел жәрдем шақырыңыз – 103 немесе 112 нөміріне қоңырау шалыңыз;
🔹 Тыныс алуы мен жүрек соғысын тексеріңіз;
🔹 Қан кетіп жатса – қан тоқтатуға тырысыңыз (таңғыш байлау);
🔹 Егер бала есінен танып қалса – қалпына келу қалпына жатқызыңыз (бір қырына);
🔹 Су бермеңіз және ауырсынуды басатын дәрі бермеңіз, дәрігер келгенше күтіңіз.
📣 Мамандардың үндеуі:
Жаз мезгілінде ата-аналарға ерекше сақ болуды қатаң түрде ескертеміз.
Бір сәттік бейқамдық орны толмас қайғыға әкелуі мүмкін.
📌 Қорытынды:
Балалардың қауіпсіздігі – үлкендердің тікелей жауапкершілігі. Терезе – жарық пен ауа көзі ғана емес, қауіпті аймақ екенін есте сақтайық. Қарапайым сақтық – баланың өмірін сақтап қалады.
